भारताचा ७६वा प्रजासत्ताक दिन आज विविध देशांमध्येही साजरा होत आहे. बांगलादेशात राजधानी ढाका इथं भारतीय उच्चायुक्तालयात प्रजासत्ताक दिन सोहळ्याचं आयोजन करण्यात आलं होतं. बांगलादेशातले भारतीय उच्चायुक्त प्रणय वर्मा यांनी तिरंगा ध्वज फडकावला. या सोहळ्यात भारतीय समुदायाचे सदस्य मोठ्या संख्येने सहभागी झाले होते. त्यांनी देशभक्तीपर गीतंही सादर केली. श्रीलंकेत राजधानी कोलंबो इथंही भारतीय उच्चायुक्तालयात आणि इतर राजनैतिक कार्यालयांमध्ये प्रजासत्ताक दिन साजरा केला जात आहे. भारताचे उच्चायुक्त डॉ. सत्यजल पांडे यांनी कोलंबोच्या इंडिया हाऊस इथे तिरंगा फडकवला आणि श्रीलंकेत भारताच्या शांतीरक्षक दलांनी केलेल्या बलिदानाचं स्मरण करून त्यांनी कोलंबो इथल्या स्मारकाला पुष्पहार अर्पण करत आदरांजली वाहिली. श्रीलंकेच्या नौदलाच्या बँडपथकानं देशभक्तीपर गीतं सादर केली. या सोहळ्याला भारतीय समुदाय मोठ्या संख्येनं उपस्थित होता.