भारतीय जनता पक्षाचे राष्ट्रीय अध्यक्ष आणि केंद्रीय आरोग्य मंत्री जे. पी. नड्डा आज प्रचारासाठी राज्याच्या दौऱ्यावर असून ते बेलापूर, सोलापूर  आणि अहिल्यानगर इथं प्रचारसभा घेतील. उपमुख्यमंत्री देवेंद्र फडनवीस आज दुपारी नागपूर आणि नंतर वर्धा इथं जाहीर सभा घेतील. सांगली विधानसभा मतदारसंघाचे काँग्रेसचे उमेदवार पृथ्वीराज पाटील यांच्या प्रचारार्थ काँग्रेस अध्यक्ष मल्लिकार्जुन खरगे यांनी प्रचारसभा घेतली. मणिपूरमध्ये तणाव असताना देशाचे प्रधानमंत्री मात्र परदेशात फिरत आहेत, अशी टीका खरगे यांनी या सभेत केली. राष्ट्रवादी काँग्रेस शरदचंद्र पवार पक्षाचे उदगीरचे उमेदवार सुधाकर भालेराव यांच्या प्रचारार्थ पक्षाचे नेते जयंत पाटील यांनी जळकोटमध्ये जाहीर सभा घेतली. महायुतीचे नेते निवडणुकीत पैसेवाटप करत असल्याचा आरोप यावेळी जयंत पाटील यांनी केला.