राज्यातल्या विधानसभा निवडणुकीसाठी उद्या सकाळी ७ ते संध्याकाळी ६ वाजेपर्यंत मतदान होणार आहे. त्यासाठी अधिकारी-कर्मचारी मतदान केंद्रांवर रवाना होत आहेत. राज्यात यंदा ९ कोटी ७० लाखांहून अधिक मतदार २८८ आमदारांना निवडून देणार आहे. त्यांच्यासाठी १ लाख ४२७ मतदान केंद्रं उभारली असून दुर्गम भाग वगळता इतर ठिकाणी सकाळी ७ ते संध्याकाळी ६ पर्यंत मतदान होईल. सर्वाधिक सुमारे साडे ८ हजार मतदान केंद्र पुणे जिल्ह्यात आहेत. त्यानंतर मुंबई उपनगर, ठाणे, या जिल्ह्यांचा क्रमांक लागतो. सर्वात कमी सव्वा ९ शे मतदान केंद्र सिंधुदुर्ग जिल्ह्यात आहेत. गडचिरोलीत सुद्धा १ हजार पेक्षा कमी मतदान केंद्र आहेत. मतदारसंघाचा विचार करता सर्वाधिक ५७४ मतदान केंद्र रायगड जिल्ह्यात पनवेल मतदार संघात आहेत. खडकवासला, भोसरी, हडपसर, मुरबाड, नालासोपारा वगैरे मतदार संघात मोठ्या प्रमाणात मतदान केंद्र आहेत. मुंबईत वडाळा मतदारसंघात सर्वात कमी म्हणजे २२३ मतदान केंद्र आहेत. वरळी, माहिम, कुलाबा, मुंबादेवी या मतदारसंघातही मतदान केंद्रांची संख्या अडीचशे पेक्षा कमी आहे. सर्वाधिक सर्वाधिक २६ मतदार संघ मुंबई उपनगर जिल्ह्यात असून त्यानंतर पुणे, छत्रपती संभाजीनगर यांचा क्रमांक लागतो.