जम्मू-काश्मीरमध्ये आज विधानसभा निवडणुकीच्या पहिल्या टप्प्यात संध्याकाळी पाच वाजेपर्यंत ५८ पूर्णांक १९ शतांश टक्के मतदान झालं आहे. पहिल्या टप्प्यातल्या २४ विधानसभा मतदारसंघांत सकाळी ७ वाजता मतदानाला सुरुवात झाली. संध्याकाळी पाच वाजेपर्यंत काश्मीरमधल्या १६ मतदारसंघांपैकी सर्वाधिक ६७ पूर्णांक ८६ शतांश इतकी टक्केवारी पहलगाम इथं नोंदवली गेली. त्राल विभागात सर्वात कमी म्हणजे ४० पूर्णांक ५८ शतांश टक्के इतकं मतदान झालं.
जम्मू विभागात सायंकाळी पाच वाजेपर्यंत ८ मतदारसंघांपैकी किश्तवाड जिल्ह्यातल्या इंदरवाल मतदारसंघात सर्वाधिक ८० पूर्णांक ६ शतांश टक्के मतदान झालं आहे. रामबन मध्ये ४६ पूर्णांक ८ दशांश टक्के इतक्या मतदानाची नोंद झाली.