भारताच्या परकीय चलन साठ्यात ३० ऑगस्ट रोजी संपलेल्या आठवड्यात २ अब्ज डॉलर्सहून अधिक वाढ होऊन त्यानं जवळपास ६८४ अब्ज डॉलर्सच्या नवीन उच्चांकावर झेप घेतली. भारतीय रिझर्व बँकेनं काल जाहीर केलेल्या आकडेवारीनुसार, डॉलरच्या निरंतर आणि सुदृढ प्रवाहामुळं परकीय चलन साठ्यातील ही सलग तिसरी साप्ताहिक वाढ आहे. गेल्या तीन आठवड्यांत, या गंगाजळीत १४ अब्ज डॉलर्सची भर पडली. सोन्याचा साठा ८६२ दशलक्ष डॉलरनं वाढून अंदाजे ६२ अब्ज डॉलर्सवर पोहोचला असंही या आकडेवारीत म्हटलं आहे.