अमेरिकेचे माजी राष्ट्राध्यक्ष जिमी कार्टर यांचं काल रात्री जॉर्जियातल्या प्लेन्स इथल्या निवासस्थानी निधन झालं. ते १०० वर्षांचे होते. कार्टर हे १९७७ ते १९८१ या कालावधीत अमेरिकेचे राष्ट्राध्यक्ष होते. त्यांना २००२ मध्ये शांततेसाठीचा नोबेल पुरस्कार मिळाला होता. ते आतापर्यंतचे सर्वात वयोवृद्ध राष्ट्रपती होते. भारताला भेट देणारे कार्टर हे अमेरिकेचे तिसरे राष्ट्राध्यक्ष होते. त्यांच्या सन्मानार्थ हरियाणातल्या एका गावाचं नाव कार्टरपुरी ठेवण्यात आलं. जिमी कार्टर यांनी भारत दौऱ्यावर असताना तत्कालीन प्रधानमंत्री मोरारजी देसाई यांच्यासोबत दिल्ली जाहीरनाम्यावर स्वाक्षरी केली होती. या घोषणेनं भारत-अमेरिका संबंधांचं नवं पर्व सुरू झालं.
प्रधानमंत्री नरेंद्र मोदी यांनी जिमी कार्टर यांच्या निधनाबद्दल शोक व्यक्त करत त्यांना आदरांजली वाहिली आहे. कार्टर हे दूरदृष्टीचे महान राजकारणी होते. जागतिक शांततेसाठी त्यांनी अथक परिश्रम घेतले. भारत- अमेरिकेतले संबंध आणखी मजबूत करण्यात त्यांचं मोठं योगदान आहे, असं मोदी आपल्या शोकसंदेशात म्हणाले आहेत.