अमरावतीमध्ये उभारण्यात आलेल्या टेक्सटाईल पार्कमुळे ५० हजार लोकांना रोजगार मिळाला असून प्रधानमंत्री नरेंद्र मोदी यांनी अमरावतीत आणखी एक पार्क तयार करण्याची घोषणा केली असून त्यामुळे दहा लाख लोकांना रोजगार मिळणार असल्याचं भाजपा नेते देवेंद्र फडणवीस यांनी म्हटलं आहे. ते आज पांढरकवडा इथं भाजपा उमेदवार राजू तोडसाम यांच्या प्रचारसभेत बोलत होते. आमचं सरकार शेतकऱ्यांचं सरकार असून त्यामुळे आम्ही शेतकऱ्यांसाठी अनेक योजना आणल्या आहेत. शेतकऱ्यांचं वीजबिल माफ करण्यात आलं आहे असंही ते म्हणाले.
त्यानंतर फडणवीस यांनी यवतमाळच्याच फुलसावंगी इथे भाजपा उमेदवार किसन वानखेडे यांच्यासाठी प्रचारसभा घेतली. या सभेत फडणवीस यांनी राहुल गांधी यांच्यावर टीका केली. राहुल गांधी यांनी संविधान बचाव रॅली करून संविधानाचा अपमान केला, कारण त्यावेळी त्यांच्या हातात असलेलं पुस्तक हे संविधानाची प्रत नव्हती, अशी टीका फडणवीस यांनी या प्रचारसभेत केली.