राज्यात कृषी निविष्ठांची कृत्रिम टंचाई भासवली जात असून, या प्रकरणी धडक कारवाई केली जात असल्याचं, कृषी मंत्री धनंजय मुंडे यांनी सांगितलं आहे. ते काल बीड इथं वार्ताहर परिषदेत बोलत होते. राज्यात बी-बियाणे, खते, कीटकनाशकांचा कुठेही तुटवडा भासू देणार नाही, याबाबत शासन स्तरावर कृती दल नेमून नियोजन करण्यात येत असल्याची माहिती मुंडे यांनी यावेळी दिली. दरम्यान, बीड जिल्ह्यात महावितरण कडील प्रलंबित कामं, पावसाळ्याचं नियोजन, विविध योजना आदींच्या संदर्भात काल मुंडे यांच्या उपस्थितीत बैठक घेण्यात आली.