संतश्रेष्ठ ज्ञानेश्वर माउलींच्या पालखी सोहोळा प्रस्थानाच्या पार्श्वभूमीवर आळंदीत वारकरी दिंड्यांची वाहने सोडून अन्य अवजड वाहनांच्या वाहतुकीला बंदी घालण्यात आली आहे. त्याचबरोबर आळंदीच्या प्रवेशद्वारावर पोलिसांची तपासणी नाके उभारण्यात आले आहेत. येत्या १२ तारखेपर्यंत हे निर्बंध कायम राहणार आहेत. येत्या रविवारी माउलींच्या पालखी सोहोळ्याचे प्रस्थान होणार असून त्या दिवशी रात्रीचा मुक्काम समाधी मंदिराशेजारील आजोळ घरीच राहणार आहे. सोमवारी सायंकाळपर्यंत पालखी पुण्यनगरीत दाखल होणार आहे. दरम्यान राज्यातून तसंच राज्याबाहेरुनही मोठ्या संख्येनं वारकरी भाविक अलंकापुरीमध्ये दाखल होऊ लागले असून इंद्रायणीचा काठ विठू माऊलीच्या गजरानं दुमदुमून गेला आहे.