लोकसभेत आज चांद्रयान-३ चे यश आणि अवकाश तंत्रज्ञान क्षेत्रातल्या इतर यशाबद्दल चर्चा झाली. विकसित देश चंद्रापर्यंत पोहोचण्याचा प्रयत्न करत असताना भारतानं चंद्राच्या दक्षिण ध्रुवावर पोहोचण्यात यश आल्याचं संरक्षण मंत्री राजनाथ सिंग यांनी चर्चा सुरू करताना म्हटलं. इस्रोच्या महिला शास्त्रज्ञांचंही त्यांनी अभिनंदन केलं. चंद्रावर अलगद उतरुन भारतानं नवा इतिहास रचल्याचं काँग्रेस खासदार शशी थरुर म्हणाले. त्यांनी अवकाश संशोधन क्षेत्रातल्या पंडित जवाहरलाल नेहरू, विक्रम साराभाई, सतिष धवन यांच्या योगदानाची आठवण काढली. द्रमुकचे ए राजा, तृणमृल काँग्रेसचे सौगत रॉय, राष्ट्रवादी काँग्रेसच्या सुप्रिया सुळे, शिवसेनेचे प्रतापराव जाधव, समाजवादी पक्षाच्या डिंपल यादव यांनीही इस्रोचं कौतुक केलं.