राष्ट्रीय लोकशाही आघाडी सरकारला गेल्या महिन्यात नऊ वर्षे पूर्ण झाली. केंद्र सरकारनं राबवलेल्या उपक्रमांवर आकाशवाणी वृत्त विभागाद्वारे बातम्यांची विशेष मालिका सुरू केली जात आहे. आज आपण मातृवंदन योजने बद्दल जाणून घेऊया. महिलांच्या शैक्षणिक, सामाजिक, आर्थिक आणि राजकीय सक्षमीकरणासाठी सरकारने गेल्या काही वर्षांत अनेक योजनाबद्ध आणि कायदेविषयक योजना सुरू केल्या आहेत. त्यामुळे महिलांचा अनेक बाबतीत स्तर उंचावला आहे. केंद्र सरकारनं १ जानेवारी २०१७ ला प्रधानमंत्री मातृवंदन योजना सुरू केली. या योजने अंतर्गत गर्भवती, बाळंत महिलांचं आणि नवजात बालकांचं आरोग्य सुधारण्यासाठी आणि पोषण आहार मिळावा यासाठी आर्थिक मदत दिली जाते.

आतापर्यंत २ कोटी ७९ लाख महिलांनी या योजनेचा लाभ घेतला आहे. या योजनेअंतर्गत आतापर्यंत १२ कोटी २४१ लाख रुपये वितरीत करण्यात आले आहेत. या योजनेअंतर्गत पहिल्या दोन प्रसुतींसाठी आर्थिक मदत केली जाते. पण दुसरं बाळ मुलगी असणं बंधनकारक आहे. या पहिल्या य़ोजने अंतर्गत प्रसुतीनंतर ५ हजार रुपये दोन टप्प्यात दिले जातात. दुसऱ्या प्रसुतीनंतर एकाच टप्प्यात ६ हजार रुपये दिले जातात. या योजनेमुळे भ्रुणहत्येला बऱ्याच प्रमाणात आळा बसला आहे. तसंच लिंग गुणोत्तरात सुधारणा झाली आहे.