कसोटी क्रिकेट विश्व चषक स्पर्धेत भारत आणि ऑस्ट्रेलिया यांच्यात कालपासून लंडनमधे सुरु झालेल्या अंतिम सामन्यात ऑस्ट्रेलियाचा पहिला डाव आज ४६९ धावांवर संपला. कालच्या तीन बाद ३२७ धावांवरुन ऑस्ट्रेलियानं आज पुढं खेळायला सुरुवात केल्यानंतर स्टीव्हन स्मिथनं शतक पूर्ण केलं. तो १२१ धावांवर बाद झाला. ट्रॅव्हीस हेडनं १६३ धावा केल्या. महंमद सिराजच्या चेंडूवर तो झेलबाद झाला. अॅलेक्स कॅरेनं ४८ धावा केल्या.या डावात भारतातर्फे महंमद सिराजनं ४ गडी बाद केले. ठाकूर आणि शामी प्रत्येकी दोन, तर जडेजानं एक बळी मिळवला. शेवटची बातमी हाती आली तेव्हा भारताच्या पहिल्या डावात ३ षटकात बिन बाद २२ धावा झाल्या होत्या.