परराष्ट्र व्यवहारमंत्री एस जयशंकर आणि ऑस्ट्रेलियाचे परराष्ट्र व्यवहार मंत्री पेनी वाँग यांच्यात आज नवी दिल्ली इथं १४ वा परराष्ट्र मंत्रीस्तरीय संवाद होणार आहे. यावेळी परस्पर नेत्यांमध्ये सर्वसमावेशक भागीदारी तसंच प्रादेशिक आणि जागतिक पातळीवरील समान मुद्द्यांवर चर्चा होईल. दोन्ही नेत्यांनी संरक्षण मंत्री राजनाथ सिंह तसंच ऑस्ट्रेलियाचे संरक्षण मंत्री रिचर्ड मार्ल्स यांच्याबरोबर काल भेट घेऊन विविध विचारांची देवाणघेवाण केली.

दोन्ही देशांमध्ये २००९ पासून परस्पर धोरणात्मक भागीदारीची प्रक्रिया सुरु असून २०२० पर्यंत  सर्वसमावेशक भागीदारी वृद्धिंगत झाली असल्याचं यावेळी नमूद करण्यात आलं. भारत ऑस्ट्रेलियाचा सहावा सर्वात मोठा व्यापारी भागीदार असून उभय देशांमधल्या व्यापारात ४१ टक्क्यांनी वाढ झाली आहे. ऑस्ट्रेलियामध्ये वसलेला भारतीय समुदाय आणि त्या देशात शिक्षण घेणारे भारतीय विद्यार्थी हा दोन्ही देशातला दुवा असून इंग्लंड नंतर ऑस्ट्रेलियामध्ये सर्वात मोठ्या प्रमाणात भारतीय स्थलांतरित झाले असल्याचं यावेळी अधोरेखित करण्यात आलं.