संयुक्त महाराष्ट्राच्या निर्मितीसाठी बलिदान देणाऱ्या १०७ हुतात्म्यांना आज आदरांजली वाहण्यात येत आहे. मुंबईत हुतात्मा चौक इथल्या हुतात्मा स्मारकाला मुख्यमंत्री एकनाथ शिंदे यांनी पुष्पचक्र अर्पण करून अभिवादन केलं. ‘या १०७ हुतात्म्यांच्या बलिदानामुळेच मुंबई महाराष्ट्राला मिळाली असून त्यांचं  बलिदान कधीही विसरता येणार नाही’, अशा शब्दात त्यांनी श्रद्धांजली वाहिली. शहिदांना केवळ अभिवादन करून उपयोग नाही तर आपलं  राज्य प्रत्येक क्षेत्रात आघाडीवर नेऊन त्यांचा नावलौकिक सदैव अबाधित ठेवणं,  हीच या हुतात्म्यांना खरी आदरांजली ठरेल, असं ते म्हणाले. कार्यक्रमाला विधानपरिषदेच्या उपसभापती नीलम गोऱ्हे, विधानसभा अध्यक्ष राहुल नार्वेकर, उपमुख्यमंत्री अजित पवार, मुंबई शहर जिल्ह्याचे पालकमंत्री दीपक केसरकर आदी मान्यवर उपस्थित होते.