G-20 शिखर परिषदेच्या यशाचं श्रेय ही परिषद व्यवस्थित पद्धतीनं चालू राहावी यासाठी काम करणाऱ्या G-20 च्या संघाला असल्याचं प्रधानमंत्री नरेंद्र मोदी यांनी म्हटलं आहे. नवी दिल्लीत काल भारत मंडपममध्ये G-20 परिषदेच्या आयोजनात सहभागी अधिकाऱ्यांबरोबर ते संवाद साधत होते. या अधिकाऱ्यांनी त्यांचे अनुभव शब्दबद्ध करावेत ज्यामुळे भविष्यातल्या आयोजनासाठी ते  दिशादर्शक होईल, अशी सूचना त्यांनी केली. G-20 चं यश म्हणजे जगभरात लिहिली गेलेली संपादकीयं नसून, जगभरात भारताविषयी तयार झालेला विश्वास आहे, असं त्यांनी नमूद केलं. दिल्लीत २०१० मध्ये झालेल्या राष्ट्रकुल स्पर्धेत अनेक गोष्टींमुळे भारताविषयी अनादर निर्माण झाल्याची आठवण त्यांनी करून दिली आणि देशाचं ब्रँडिंग करण्याची संधी गमावण्यात आली, असं सांगितलं.जागतिक पातळीवरच्या संकटांमध्ये मदतींमध्ये भारतानं दिलेल्या योगदानामुळे भारताचा विश्वास वाढत आहे, असं सांगून त्यांनी नेपाळ आणि तुर्कीयेतील भूकंप, फिजीतील चक्रीवादळ, मालदीवमधील पाणी संकट, श्रीलंकेतील आर्थिक पेच आणि येमेनमधील संकट अशी उदाहरणं दिली. अशा विविध पेचांमध्ये भारताकडून दिल्या जाणाऱ्या मदतीमुळे भारत बलवान आहे आणि गरज असलेल्या सर्वांपर्यंत मदतीचा हात पुढे करत आहे, अशी धारणा तयार होत आहे, असं त्यांनी सांगितलं.