मेघालयमध्ये विधानसभा निवडणुकीसाठी अर्ज भरण्याची प्रक्रिया सुरू आहे.मेघालयचे मुख्य निवडणूक अधिकारी एफआर. खारकोन्गॉर यांनी काल दक्षिण गारो हिल्स भागातून मतदानाच्या तयारीचा आढावा घेतला.

राज्यातला सत्ताधारी आघाडीत सामील असलेला हिल स्टेट पीपल्स डेमॉक्रॅटिक पक्षाने आपला जाहीरनामा प्रसिद्ध केला. पक्षाने घटनेच्या कलम 371 नुसार खासी जयंतिया या स्वतंत्र राज्याची मागणी लावून धरणार असल्याचे जाहीरनाम्यात म्हटले आहे. दरम्यान बागमरा मतदारसंघातील अपक्ष आमदार सॅम्युअल संगमा यांनी आपल्या सदस्यत्वाचा राजीनामा काल सादर केला आहे. त्यांना भाजप कडून त्याच जागेसाठी उमेदवारी देण्यात आली आहे.

भाजपने काल सर्व 60 विधानसभा जागांसाठी उमेदवारांची यादी जाहीर केली.त्रिपुरामध्येही निवडणुकीच्या प्रचाराला वेग आला असून, भाजपा चे राष्ट्रीय अध्यक्ष जे. पी. नड्डा प्रचारात सहभागी होणार असून ते अमरपूर आणि पाबियाचेरा इथल्या प्रचारसभेला उपस्थित राहाणार आहेत.

नागालँड मध्ये होणाऱ्या निवडणुकांसाठी भाजप आणि एनडीपीपी पक्षांनी आपली उमेदवार यादी काल जाहीर केली आहे. त्यामध्ये तीन महिला उमेदवारांचा समावेश आहे.