रशिया-युक्रेन युद्धाच्या पार्श्वभूमीवर युरोपियन संघटनेच्या वरिष्ठ अधिकाऱ्यांनी काल रशिया विरोधात नवीन निर्बंध घोषित केले. यामध्ये रशियाकडून तेल आयातीवर संपूर्ण बंदी आणि रशियामधली सर्वात मोठी बँक आणि प्रमुख प्रसारकांवर लक्ष ठेवण्याचा प्रस्ताव आहे.

येत्या सहा महिन्यांमध्ये रशियाच्या कच्च्या तेलाची युरोपियन देशांकडून होणारी खरेदी कमी करणं तसंच चालू वर्ष अखेरीपर्यंत शुद्धीकरण केलेल्याला ऊर्जा उत्पादनांची आयात बंद करण्याच्या योजनेची घोषणा यूरोपीय आयोगाच्या अध्य‍क्ष उर्सुला वॉन डेर लेयेन यांनी केली आहे. रशियावरचा दबाव वाढवणं आणि युरोपचं नुकसान कमी करणं हा या घोषणेमागचा उद्देश असल्याचं त्यांनी सांगितलं.

युरोपियन संघटनेच्या राजदूतांची अनुमती मिळाल्यावर पुढील काही दिवसांमध्ये या प्रस्तावावर स्वाक्षरी होण्याची शक्यता असल्याचं त्या म्हणाल्या. दरम्यान, हंगेरीनं हा प्रस्ताव फेटाळला आहे, तर चेक गणराज्य आणि स्लोवाक सरकारनं यासाठी आणखी काही वेळ मागितला आहे.