ઉત્તરપ્રદેશના પ્રયાગરાજ ખાતે આગામી તા. ૧૩મી જાન્યુઆરીથી મહાકુંભ ૨૦૨૫નો પ્રારંભ થશે. આ મહાકુંભનો મેળો તા. ૨૬ ફેબ્રુઆરી સુધી ચાલશે. આ ભવ્ય કાર્યક્રમ પોષ પૂર્ણિમાના પવિત્ર અમૃત સ્નાનથી શરૂ થશે અને મહાશિવરાત્રીના દિવસે મહાકુંભ ૨૦૨૫ના છેલ્લા અમૃત સ્નાન સાથે સમાપ્ત થશે.

ઉત્તર પ્રદેશના મુખ્યમંત્રી યોગી આદિત્યનાથે જણાવ્યું છે કે, આ વર્ષે અંદાજીત ૪૦ કરોડથી વધુ શ્રદ્ધાળુઓ આ મહાકુંભમાં સહભાગી થશે. આ અવસરે મુખ્યમંત્રી યોગી આદિત્યનાથ મહાકુંભ 2025 ને સમર્પિત આકાશવાણીની કુંભવાણી ચેનલને પણ લોન્ચ કરશે.
માહિતી અને પ્રસારણ રાજ્યમંત્રી ડૉ. એલ. મુરુગન આ કાર્યક્રમમાં વર્ચ્યુઅલી જોડાશે. કાર્યક્રમ દરમિયાન મુખ્યમંત્રી કુંભ મંગલ ધૂનનું પણ લોન્ચ કરશે. આકાશવાણીની કુંભવાણી ચેનલ પર આજથી 26 ફેબ્રુઆરી સુધી સવારે 5:55 થી સાંજે 10:05 વાગ્યા સુધી મહાકુંભની દરેક પ્રવૃત્તિ પર આધારિત વિવિધ કાર્યક્રમોનું પ્રસારણ કરાશે. આ કાર્યક્રમ 103.5 MHz ફ્રીક્વન્સી, ન્યૂઝનએર એપ અને વેવ્ઝ OTT પર સાંભળી શકાશે.