રાજ્યસભામાં આજે સામાન્ય બજેટ 2024-25 પર ચર્ચા ફરી શરૂ થઈ. ચર્ચામાં ભાગ લેતા, રાષ્ટ્રવાદી કોંગ્રેસ પાર્ટીના પ્રફુલ્લ પટેલે જણાવ્યું હતું કે સરકારે રાજકોષીય અભિગમ અપનાવ્યો છે અને 2014 થી દેશની નાણાકીય સ્થિતિ જાળવી રાખી છે. તેમણે કહ્યું કે, આ વર્ષના બજેટમાં યુવાનો માટે નોકરીઓનું સર્જન કરવા પર મહત્તમ ધ્યાન આપવામાં આવી રહ્યું છે.. તેમણે કહ્યું કે, છેલ્લા દસ વર્ષમાં દેશમાં રસ્તાઓ, એરપોર્ટ, દરિયાઈ બંદરો અને નવીનીકરણીય ઊર્જાનું વ્યાપક નેટવર્ક બનાવવામાં આવ્યું છે. ભારતીય જનતા પાર્ટીના સાંસદ ભુવનેશ્વર કલિતાએ કહ્યું કે આ વર્ષનું બજેટ ગરીબો, ખેડૂતો, યુવાનો, મહિલાઓ, મધ્યમ વર્ગ અને માળખાગત વિકાસ પર ધ્યાન કેન્દ્રિત કરે છે. તેમણે કહ્યું કે 25 કરોડ લોકો ગરીબી રેખામાંથી બહાર આવ્યા છે. તેમણે કહ્યું કે સરકાર 80 કરોડ લોકોને મફત અનાજ આપી રહી છે.
દરમિયાન, ચર્ચામાં કેન્દ્રીય મંત્રી અને ભાજપના અધ્યક્ષ જેપી નડ્ડાએ કહ્યું કે કેન્દ્રીય બજેટ દેશના સર્વસમાવેશક વિકાસ અને આર્થિક અને સામાજિક વિકાસ માટે છે. શ્રી નડ્ડાએ જણાવ્યું હતું કે આ બજેટનું ધ્યાન રોજગાર સર્જન તેમજ માળખાકીય સુવિધાઓના વિકાસ પર છે. તેમણે કહ્યું હતું કે આ બજેટમાં ગરીબી નાબૂદી, ગરીબોનું સશક્તિકરણ, ખેડૂતોને સહાયતા અને ગામડાઓને મજબૂત કરવા પર વિશેષ ધ્યાન આપવામાં આવ્યું છે. તેમણે સમાજના ગરીબ અને વંચિત વર્ગના ઉત્થાન માટે જન ધન યોજના અને પ્રધાનમંત્રી ઉજ્જવલા યોજના સહિત અનેક સરકારી પહેલો પર સૌનું ધ્યાન કેન્દ્રિત કર્યું. શ્રી નડ્ડાએ કહ્યું કે દેશના 95 ટકા ગામડાઓ પ્રધાનમંત્રી ગ્રામ સડક યોજના દ્વારા રસ્તાઓ દ્વારા જોડાયેલા છે. તેમણે કહ્યું કે ભારત ત્રીજું સૌથી મોટું ઓટોમોબાઇલ ઉત્પાદક બની ગયું છે. તેમણે અગ્નવીર યોજના પર સરકારની ટીકા કરવા બદલ કોંગ્રેસ પર આક્ષેપ કર્યા અને કહ્યું કે આ યોજનાનો હેતુ ભારતીય સશસ્ત્ર દળોને મજબૂત કરવાનો છે.