રાજ્યમાં ઉનાળાની શરૂઆત સાથે આકરો તાપ પડી રહ્યો છે ત્યારે વન્યજીવોની સુરક્ષા માટે કચ્છ માં વન વિભાગે વિશેષ વ્યવસ્થા ગોઠવી છે.
અમારાં પ્રતિનિધિ હેમાંગ પટણી પશ્ચિમ કચ્છ વન વિભાગના નાયબ વન સંરક્ષક યુવરાજસિંહ ઝાલાના અહેવાલને ટાંકીને જણાવે છે કે વધતી ગરમીને ધ્યાનમાં રાખીને વન વિભાગે અભયારણ્ય અને જંગલ વિસ્તારમાં 80 કૃત્રિમ વોટર પોઈન્ટ બનાવ્યા છે. આ પોઈન્ટ્સ પર ટેન્કર દ્વારા નિયમિત પાણી પહોંચાડવામાં આવે છે. વન્યજીવોની સુરક્ષા માટે દરેક વોટર પોઈન્ટ પર ટ્રેપ કેમેરા લગાવવામાં આવ્યા છે.
ગરમીથી અસરગ્રસ્ત કે ઘાયલ પશુ-પક્ષીઓ જોવા મળે તો વન વિભાગની હેલ્પલાઈન પર તાત્કાલિક જાણ કરવા અપીલ પણ કરવામાં આવી છે. લોકોને પોતાના ઘર આસપાસ પશુ-પક્ષીઓ માટે પાણીના વાસણ મૂકવાની અપીલ પણ કરવામાં આવી છે.