રાજ્યમાં આજે 154 તાલુકામાં સાર્વત્રિક વરસાદ નોંધાયો છે. સત્તાવાર આંકડા મુજબ, રાજ્યમાં આજે સવારે 6 વાગ્યાથી સાંજે ચાર વાગ્યા દરમિયાન 154 તાલુકામાં વરસાદ વરસ્યો છે. સૌથી વધારે છ ઈંચ વરસાદ દેવભૂમિદ્વારકા જિલ્લાના દ્વારકા તાલુકામાં નોંધાયો હતો. જ્યારે કચ્છના માંડવીમાં સાડા પાંચ ઇંચ, જામનગરના જોડિયા તાલુકામાં સવા પાંચ ઈંચ વરસાદ વરસ્યો છે.
હવામાન વિભાગે, આવતીકાલે દક્ષિણ ગુજરાતમાં સુરત, નવસારી, વલસાડ, દમણ અને દાદરાનગર હવેલીમાં, સૌરાષ્ટ્રમાં રાજકોટ, પોરબંદર, જુનાગઢ, દ્વારકા, ગીર સોમનાથ, તેમજ કચ્છમાં કેટલાંક સ્થળોએ ભારેથી અતિભારે વરસાદની આગાહી કરવામાં આવી છે. સુરેન્દ્રનગર, અમરેલી, ભાવનગર, મોરબી, બોટાદ, અમદાવાદ, આણંદ, વડોદરાં જિલ્લામાં છુટાછવાયાં સ્થળોએ વરસાદની શક્યતા છે. આ સાથે જ હળવાથી મધ્યમ વરસાદી ઝાપટાં તેમજ પવનની ગતિ 30 થી 40 કિલોમીટર પ્રતિકલાક રહેવાની સંભાવના છે.