માર્ગ પરિવહન અને ધોરી માર્ગ મંત્રી નીતિન ગડકરીએ આજે જણાવ્યું હતું કે સરકાર હાઈડ્રોજનના ઉપયોગ દ્વારા આગામી વર્ષોમાં આશરે 22 લાખ કરોડ રૂપિયાના અશ્મિભૂત ઇંધણની આયાતને ઘટાડીને 4 લાખ કરોડ રૂપિયા કરવાનું લક્ષ્ય રાખે છે. દિલ્હીમાં એક કાર્યક્રમમાં શ્રી ગડકરીએ કહ્યું કે સરકાર મીરાઈ પ્રોજેક્ટ પર ઝડપથી કામ કરી રહી છે. મિરાઈ એક એવી કાર છે જે કચરામાંથી ઉત્પાદિત હાઈડ્રોજનનો ઈંધણ તરીકે ઉપયોગ કરે છે. તેમણે એમ પણ કહ્યું કે બાયોટેકનોલોજીનો ઉપયોગ કરીને સસ્તા દરે હાઇડ્રોજનનું ઉત્પાદન શક્ય બની શકે છે.
મંત્રાલયે ભારતને ઉર્જા નિકાસ કરતો દેશ બનાવવા માટે એક ડોલર પ્રતિ કિલોગ્રામના દરે હાઇડ્રોજનનું ઉત્પાદન કરવાનો લક્ષ્યાંક નક્કી કર્યો છે. રાષ્ટ્ર નિર્માણમાં કૃષિના મહત્વ પર ભાર મૂકતા શ્રી ગડકરીએ જણાવ્યું હતું કે આપણા ખેડૂતો માત્ર ખાદ્ય પ્રદાતા જ નથી પરંતુ ઉર્જા પ્રદાતા, બળતણ પ્રદાતા અને હાઇડ્રોજન પ્રદાતા પણ છે, કારણ કે તેઓ પરાળીનો ઉપયોગ કરીને બાયો-ઇથેનોલનું ઉત્પાદન કરવામાં સક્ષમ છે. તેમણે ખાનગી સંસ્થાઓને ગ્રામીણ અને આદિવાસી વિસ્તારો પર ધ્યાન કેન્દ્રિત કરવા પણ વિનંતી કરી. તેમણે ચિંતા વ્યક્ત કરી કે મેટ્રો શહેરો પર વધુ પડતો ભાર દેશમાં આર્થિક અસમાનતા તરફ દોરી રહ્યો છે.