પ્રધાનમંત્રી નરેન્દ્ર મોદીએ કહ્યું કે, ભારત છેલ્લા દાયકામાં 10મા સ્થાનથી ઉપર આવીને 5મું સૌથી મોટું અર્થતંત્ર બન્યું છે. પ્રધાનમંત્રીએ આજે સવારે દિલ્હીના દ્વારકાના યશોભૂમિ ખાતે ભારત ઊર્જા સપ્તાહ 2025નું વર્ચ્યુઅલી ઉદ્ઘાટન કરતી વખતે આ વાત કરી હતી. શ્રી મોદીએ ભાર મૂક્યો કે, દેશની સૌર ઊર્જા ઉત્પાદન ક્ષમતા 32 ગણી વધી છે. તેમણે ઉલ્લેખ કર્યો કે, ભારત ત્રીજો સૌથી મોટો સૌર ઊર્જા ઉત્પન્ન કરતો દેશ છે. પ્રધાનમંત્રીએ ઉમેર્યું કે, બિન-અશ્મિભૂત ઇંધણ ઊર્જા ક્ષમતા ત્રણ ગણી વધી છે. તેમણે કહ્યું કે, ભારત પેરિસ G20 કરારોના લક્ષ્યોને પૂર્ણ કરનાર પ્રથમ રાષ્ટ્ર છે.

પ્રધાનમંત્રી મોદીએ ભાર મૂક્યો કે, ભારત ફક્ત પોતાના વિકાસને જ નહીં પરંતુ વિશ્વના વિકાસને પણ આગળ ધપાવી રહ્યું છે. શ્રી મોદીએ કહ્યું કે, આજે, ભારતનો બાયોફ્યુઅલ ઉદ્યોગ ઝડપથી વિકાસ કરવા માટે તૈયાર છે. તેમણે ઉમેર્યું કે, દેશ પાસે 500 મિલિયન મેટ્રિક ટન ટકાઉ ફીડસ્ટોક છે.
ઇથેનોલ મિશ્રણ વિશે બોલતા, શ્રી મોદીએ કહ્યું કે, દેશ હાલમાં 19 ટકા ઇથેનોલનું મિશ્રણ કરી રહ્યું છે, જેનાથી વિદેશી હૂંડિયામણ બચાવવામાં મદદ મળી છે, ખેડૂતો માટે નોંધપાત્ર આવક થઈ છે અને CO2 ઉત્સર્જનમાં નોંધપાત્ર ઘટાડો થયો છે. પ્રધાનમંત્રીએ જણાવ્યું હતું કે ભારત ઓક્ટોબર 2025 પહેલા 20 ટકા ઇથેનોલ મિશ્રણનો લક્ષ્યાંક પ્રાપ્ત કરવાના માર્ગ પર છે.
પ્રધાનમંત્રીએ ભાર મૂક્યો કે, ‘મેક ઇન ઇન્ડિયા’ પહેલ હેઠળ, દેશ સ્થાનિક સપ્લાય ચેઇન અને ઉત્પાદનને મજબૂત બનાવવા પર ધ્યાન કેન્દ્રિત કરી રહ્યો છે. શ્રી મોદીએ કહ્યું કે, આગામી બે દાયકા વિકસિત ભારત માટે મહત્વપૂર્ણ રહેશે અને ઉમેર્યું કે, આગામી 5 વર્ષમાં દેશ ઘણા મોટા સીમાચિહ્નો પાર કરશે. તેમણે નોંધ્યું કે, ભારતના ઘણા ઊર્જા લક્ષ્યો 2030 ની સમયમર્યાદા સાથે સુસંગત છે. તેમણે સ્વીકાર્યું કે, આ લક્ષ્યો મહત્વાકાંક્ષી લાગે છે, પરંતુ છેલ્લા
10 વર્ષોમાં થયેલી પ્રગતિએ વિશ્વાસ જગાડ્યો છે કે ભારત તેમને પ્રાપ્ત કરશે.