પેરિસ પેરાલિમ્પિક્સમાં ભારતે અત્યાર સુધીમાં કુલ 20 ચંદ્રક જીતી લીધા છે. જેમાં 3 સુવર્ણ, 7 રજત અને 10 કાંસ્ય ચંદ્રકોનો સમાવેશ થાય છે. ગઈકાલે ભારતે પાંચ ચંદ્રકો જીત્યા હતા.
જેમાં દીપ્તિ જીવનજીએ 400 મીટર T-20 દોડમાં કાંસ્ય ચંદ્રક, શરદ કુમાર અજિત સિંહે રજત ચંદ્રક, મરીયપ્પન થંગાવેલુએ પુરુષ કૂદમાં કાંસ્ય ચંદ્રક જયારે સુંદર ગુર્જરે પણ કાંસ્ય ચંદ્રક જીત્યા હતા. આજે સાતમા દિવસે તીરંદાજીમાં ભારતના હરવિન્દર સિંહ, સાયકલિંગમાં અરશદ શૈક અને જ્યોતિ ગડેરિયાના પ્રદર્શન પર ખાસ નજર રહેશે. પ્રધાનમંત્રી નરેન્દ્ર મોદીએ પેરાલિમ્પિક્સ રમતમાં ચંદ્રક વિજેતા તમામ ખેલાડીઓ સાથે ટેલિફોનિક વાતચીત કરી અભિનંદન પાઠવ્યા હતા.
રાષ્ટ્રપતિ દ્રૌપદી મુર્મુ અને પ્રધાનમંત્રી નરેન્દ્ર મોદીએ પેરિસ પેરાલિમ્પિક્સમાં મહિલાઓની 400 મીટર – T20 સ્પર્ધામાં કાંસ્ય ચંદ્રક જીતવા બદલ દીપ્તિ જીવનજીને અભિનંદન પાઠવ્યા છે. શ્રી મોદીએ શોશિયલ મીડિયાના માધ્યમથી જણાવ્યું કે, ભારતને ખેલાડીઓ પર ગર્વ છે.