નેશનલ કૉન્ફરન્સ પક્ષના નેતા ઑમર અબ્દુલ્લા આજે કેન્દ્રશાસિત પ્રદેશ જમ્મુ-કાશ્મીરના મુખ્યમંત્રી તરીકેના શપથ લેશે. ઉપ-રાજ્યપાલ મનોજ સિન્હા આજે સવારે સાડા 11 વાગ્યે શ્રીનગરના શેર-એ-કાશ્મીર આંતરરાષ્ટ્રીય સંમેલન કેન્દ્ર ખાતે યોજાનારા કાર્યક્રમમાં શ્રી અબ્દુલ્લા અને તેમના મંત્રી પરિષદને શપથ લેવડાવશે.
તાજેતરમાં પૂરી થયેલી વિધાનસભા ચૂંટણીમાં નેશનલ કૉન્ફરન્સ પક્ષને બહુમતી મળતા ઉપ-રાજ્યપાલે તેમને સરકાર રચવા આમંત્રણ આપ્યું હતું. આ પહેલા જમ્મુ-કાશ્મીરમાં વિધાનસભાની ચૂંટણી વર્ષ 2014માં યોજાઈ હતી. અમારા સંવાદદાતાએ જણાવ્યું કે, શપથગ્રહણ સમારોહ સ્થળ પાસે ચુસ્ત સુરક્ષા વ્યવસ્થા ગોઠવવામાં આવી છે.