ચેન્નઈમાં રમાયેલી ટેસ્ટ શ્રેણીની પ્રથમ મેચમાં ભારતે બાંગ્લાદેશ સામે 280 રનથી ભવ્ય વિજય મેળવ્યો છે. આ સાથે ભારત 2 મેચની શ્રેણીમાં એક—શૂન્યથી આગળ છે. 515 રનના મુશ્કેલ લક્ષ્યાંકનો પીછો કરતાં બાંગ્લાદેશ ચોથા દિવસે તેની બીજી ઇનિંગમાં માત્ર 234 રન બનાવી ઑલ-આઉટ થઈ ગયું હતું. ભારત તરફથી આર અશ્વિને 6 વિકેટ લઈ જીતમાં મહત્વનો ફાળો આપ્યો હતો.
ગઈકાલે ત્રીજા દિવસના અંતે બાંગ્લાદેશે 4 વિકેટ ગુમાવીને 158 રન બનાવ્યા હતા. જ્યારે ભારતે શુબમન ગિલ અને ઋષભ પંતની સદીઓની મદદથી ત્રીજા દિવસે 4 વિકેટ ગુમાવી 287 રન પર દાવ ડિકલેર કર્યો હતો.