ખેડા જિલ્લાના વસો કૃષિ મહાવિદ્યાલય ખાતે પ્રાકૃતિક કૃષિ પરિસંવાદનું આયોજન કરવામાં આવ્યું હતું.

આ પ્રસંગે ખેડાના સાંસદ દેવુસિંહ ચૌહાણે કૃષિ વિજ્ઞાન કેન્દ્રોની ૫૦ વર્ષની સુવર્ણ જયંતિ ઉજવણી નિમિત્તે કૃષિ પ્રયોગશાળાના સંશોધનોને ‘લેબ ટુ લેન્ડ’ ના સિદ્ધાંત મુજબ જમીન પર ઉતારી ખેડૂત-ઉપયોગી બનાવવા સૂચન કર્યું હતું. તેમણે જણાવ્યું હતું કે, પરંપરાગત ખેત પેદાશો સિવાય પાકની ફેરબદલી અપનાવીને ખેતીમાં નવો આયામ ઉભો કરી શકાશે. ખેતી સાથે સંકળાયેલા તમામ લોકોના સહિયારા પ્રયાસ દ્વારા જિલ્લાના ખેડુતોને પ્રાકૃતિક ખેતી અપનાવવા તેમણે હાકલ કરી હતી.

આ કાર્યક્રમ અંતર્ગત જીવામૃતના છંટકાવ માટે ૬ સ્પ્રે પંપ, ૧ શાકભાજી સુકવણીનું મશીન અને ૧ મિની રાઈસ મીલ મશીનનું વિતરણ કરવામાં આવ્યું હતું. સાથે જ ગુજરાત વિદ્યાપીઠ, કૃષિ વિજ્ઞાન કેન્દ્ર દેથલી દ્વારા પ્રકાશિત ‘પ્રાકૃતિક કૃષિ- મહત્વ, મુખ્ય આયામો અને મૂંઝવણો’ નામની પુસ્તિકાનું વિમોચન કરવામાં આવ્યું હતું.