કેન્દ્રીય નાણાં મંત્રી નિર્મલા સીતારમણે આજે નવી દિલ્હીમાં આગામી કેન્દ્રીય બજેટને અનુલક્ષીને આરોગ્ય અને શિક્ષણ ક્ષેત્રના નિષ્ણાતો અને પ્રતિનિધિઓ સાથે પરામર્શ બેઠક કરી હતી. આ બેઠકમાં નાણા સચિવ, આર્થિક બાબતોના વિભાગના સચિવો, સરકારના મુખ્ય આર્થિક સલાહકાર અને આરોગ્ય મંત્રાલય અને શાળા શિક્ષણ વિભાગના વરિષ્ઠ અધિકારીઓએ હાજરી આપી હતી. આ અગાઉ નાણામંત્રી નિર્મલા સીતારમણે ઉદ્યોગના પ્રતિનિધિઓ સાથે પ્રી-બજેટ કન્સલ્ટેશન બેઠકની અધ્યક્ષતા કરી હતી. આગામી નાણાકીય વર્ષ માટેનું કેન્દ્રીય બજેટ આવતા વર્ષે 1લી ફેબ્રુઆરીએ સંસદમાં રજૂ થાય તેવી સંભાવના છે. નાણામંત્રી નિર્મલા સીતારમણ સતત આઠમી વાર બજેટ રજૂ કરશે.