આજે પોરબંદરનાં તટરક્ષક વિમાનમથકે હેલિકોપ્ટર તૂટી પડતાં ત્રણ જવાન શહીદ થયા છે.
ભારતીય તટરક્ષકનાં ગાંધીનગર સ્થિત પ્રાદેશિક વડામથકે એક યાદીમાં જણાવ્યું છે કે, આજે બપોરે પોરબંદર વિમાનમથકનાં એર એન્કલેવ પર પર એક હેલિકોપ્ટરને નડેલા અકસ્માતમાં હેલિકોપ્ટરમાં સવાર બે પાયલટ અને ચાલકદળનાં એક જવાન શહીદ થયા છે. નિયમિત તાલીમનાં ભાગ રૂપે ઉડાન દરમિયાન આ દુર્ઘટના સર્જાઈ હતી.
ઘટના બાદ તરત જ પાયલટને પોરબંદરની સરકારી હોસ્પિટલમાં ખસેડવામાં આવ્યા હતા, જ્યાં તેમને મૃત જાહેર કરવામાં આવ્યા હતા. ઘટનાની તપાસ ચાલી રહી છે. કમાન્ડર સૌરભ, ડેપ્યુટી કમાન્ડન્ટ એસકે યાદવ અને મનોજ પ્રધાનની અંત્યેષ્ટિ તટરક્ષકની પરંપરા સાથે કરવામાં આવી હતી.
અમારા પોરબંદર જિલ્લાના પ્રતિનિધિ જણાવે છે કે બે મહિનાં અગાઉ પણ પોરબંદરનાં દરિયામાં તટરક્ષકનું હેલિકોપ્ટર તૂટી પડ્યું હતું.