पाकिस्तान गी सब्बनें चाली दे आतंकवाद दी जननी करार दिन्दे होई DGP दिलबाग सिंह होरें गलाया जे सुरक्षाबल पाकिस्तान दी भैड़ी चालें गी नाकाम करने आस्तै पूरी चाली सौहगे न। एह गल्ल उनें जम्मू च इक प्रैस कांफ्रेस गी सम्बोधित करदे होई आक्खी 

दिलबाग सिंह होरें गलाया जे 2020 बरा जम्मू.कश्मीर पुलस लेई मती सारी उपलब्धियें आहला बरा रेया। जिला विकास कौंसल दे चुना रमानदारी आहले ढंगै सिर करोआए गएए हालांकि पाकिस्तान नै इस प्रक्रिया च खल्ल पाने दी कोशिश बी कीती। उनें गलाया जे इस बरे दौरान 2 सौ 25 आतंकवादियें दा सफाया कीता गेया जिन्दे चा 46 बक्ख.बक्ख संगठनें दे सिरे दे आतंकवादी हे। होर मती जानकारी दिन्दे होई उनें गलाया जे इस बरे 16 पुलसकर्मी ते 44 नीम फौजी बलें दे जौआन आतंकवादियें कन्नै होए दे टाकरे दौरान शहीद होई गे।

आतंकवादियें 38 नागरिकें दी हत्या कीती। दिलबाग सिंह होरें गलाया जे पुलसै मते सारे भटके दे नौजवानें गी मुक्खधारा च वापस आनेया। इस बरे संघर्ष विराम दी खिलाफवर्जी आहली घटनाएं च बी बाद्दा होआ ऐ। बन्नै पर तैनात साहड़े जोआन बी नापाक हरकतें दा बनकदा परता दिन्दे न। सौहगे सुरक्षाबल पाकिस्तान आसेया कीती जाने आली घुसपैठ दीयें कोशिशें गी बी नाकाम बनांदे न। जम्मू खिते च सक्रिय आतंकवाद बारै बोलदे होई उनें गलाया जे दर्जन भर आतंकवादी जम्मू खिते च सक्रिय हे ते हुन एह गिनतरी त्रै तगर जाई पुज्जी ऐए एह बी किश्तवाड़ जिले च सक्रिय न ते पुलस उन्दा पता लाने दी कोशिश करा रदी ऐ।