■ ম্যানমাৰত শেহতীয়াকৈ অহা ৭.৭ প্রাবল্যৰ বিধ্বংসী ভূমিকম্পত মৃত্যু হোৱা লোকৰ সংখ্যা ৩,৬৪৫লৈ বৃদ্ধি পাইছে। দেশখনৰ প্ৰশাসনিক পৰিষদে প্ৰকাশ কৰা অনুসৰি এই ভূমিকম্পত কমেও ৫,০১৭ জন লোক আঘাতপ্ৰাপ্ত হৈছে আৰু ১৪৮ জন এতিয়াও সন্ধানহীন হৈ আছে। যোৱা ২৮ মাৰ্চত জোকাৰি যোৱা দুটাকৈ বিধ্বংসী ভূমিকম্পৰ পৰৱৰ্তী সময়ছোৱাত বৰ্তমানলৈকে ২.৮ৰ পৰা ৭.৫ প্রাবল্যৰ মুঠ ৯৮টা জোকাৰণি অনুভূত হৈছে বুলি ম্যানমাৰৰ বতৰ বিজ্ঞান আৰু জল বিজ্ঞান বিভাগে জানিবলৈ দিছে। এই ভূমিকম্পত দেশখনৰ প্ৰায়বোৰ অঞ্চলত বিশেষকৈ ৩খন মূল চহৰ ছাগায়িং, মাণ্ডেলে আৰু মাগৱেৰ ৮০ শতাংশৰো অধিক অট্টালিকা ক্ষতিগ্ৰস্ত হৈছে। অমেৰিকা যুক্তৰাষ্ট্ৰৰ মানৱীয় পৰিক্ৰমা সহযোগিতা কার্যালয়ে প্রকাশ কৰা তথ্য অনুসৰি দেশখনৰ ৫ লাখৰো অধিক লোক স্বাস্থ্যসেৱাৰ সুবিধাৰ পৰা বঞ্চিত হৈ আছে। ইপিনে ভাৰত, ইউৰোপীয় সংঘ, আমেৰিকা যুক্তৰাষ্ট্ৰ, ৰাষ্ট্ৰসংঘ আৰু কেইবাটাও আন্তঃৰাষ্ট্ৰীয় সংস্থাই ম্যানমাৰৰ ভূমিকম্পত ক্ষতিগ্রস্তসকলৰ বাবে সাহায্য প্ৰেৰণ কৰি আছে। ভাৰতে ইয়াৰ চুবুৰীয়া প্ৰথম আৰু এক্ট-ইষ্ট নীতিৰ অধীনত প্ৰথম সঁহাৰি জনোৱা দেশ হিচাপে অপাৰেচন ব্ৰহ্ম অভিযান ৰূপায়ণ কৰিছে। এই অভিযানৰ দিনত ভাৰতে ম্যানমাৰলৈ কেইবা টনো চিকিৎসা সামগ্ৰীকে ধৰি অন্যান্য সাহায্য সামগ্ৰী প্ৰেৰণ কৰিছে।