অসমৰ প্ৰতিভাসম্পন্ন খেলুৱৈ ৰিয়ান পৰাগে আই পি এল টি-২০ ক্রিকেট প্রতিযোগিতাত ৰাজস্থান ৰয়েলছ দলৰ প্ৰথম তিনিখন খেলত নেতৃত্ব বহন কৰিব। দলটোৱে আজি আনুষ্ঠানিকভাৱে এই কথা ঘোষণা কৰে। এই অনুসৰি ছানৰাইজাৰ্ছ হায়দৰাবাদৰ বিৰুদ্ধে অহা ২৩ মাৰ্চত, কলকাতা নাইট ৰাইডাৰ্ছৰ বিৰুদ্ধে ২৬ মাৰ্চত আৰু চেন্নাই ছুপাৰ কিংছৰ বিৰুদ্ধে ৩০ মাৰ্চত হ’বলগীয়া খেলকেইখনত ৰিয়ানে অধিনায়কৰ দায়িত্ব পালন কৰিব। পৰৱৰ্ত্তী পৰ্যায়ত সম্পূৰ্ণৰূপে সুস্থ হৈ উঠাৰ পাছত সঞ্জু ছেমচনে দলটোৰ নেতৃত্ব বহন কৰিব বুলিও ঘোষণা কৰা হৈছে। একেদৰে, মুম্বাই ইণ্ডিয়ানছ দলেও প্রতিযোগিতাৰ প্ৰথম পৰ্যায়ৰ বাবে এগৰাকী নতুন অধিনায়কৰ নাম ঘোষণা কৰিছে। অহা ২৩ মাৰ্চত চিৰবৈৰী চেন্নাই ছুপাৰ কিংছ দলৰ বিৰুদ্ধে হ’বলগীয়া খেলখনত সূর্য কুমাৰ যাদৱে দলটোৰ নেতৃত্ব বহন কৰিব।
উল্লেখযোগ্য যে লেহেমীয়া অভাৰৰ বাবে হার্দিক পাণ্ডিয়া এখন খেলৰ ক্ষেত্ৰত নিষেধাজ্ঞাৰ সন্মুখীন হোৱাৰ পৰিপ্ৰেক্ষিতত খেলুৱৈগৰাকীয়ে এই খেলখনত অংশগ্ৰহণ কৰিব নোৱাৰিব। তদুপৰি দলটোৰ আন এগৰাকী খেলুৱৈ যশপ্রীত বুমৰাও আঘাতৰ বাবে খেলৰ পৰা আঁতৰি থাকিবলগীয়া হৈছে। উল্লেখযোগ্য যে, আই পি এলৰ অষ্টাদশ সংস্কৰণৰ প্ৰতিযোগিতা অহা ২২ মাৰ্চত আৰম্ভ হ’ব। কলকাতাৰ ইডেন গার্ডেনছত হ’বলগীয়া প্ৰতিযোগিতাৰ প্ৰথমখন খেলত যোৱাবাৰৰ চেম্পিয়ন কলকাতা নাইট ৰাইডাৰ্ছ, ৰয়েল ছেলেঞ্জাৰ্ছ বেংগালুৰুৰ বিৰুদ্ধে অৱতীৰ্ণ হ’ব।