বিধি বলবৎকাৰী সঞ্চালকালয়ে কালি কামৰূপ মহানগৰ জিলাৰ অতিৰিক্ত জিলা আয়ুক্ত সুকন্যা বৰাৰ ৭ কোটি ৩৩ লাখ টকা স্থাৱৰ আৰু অস্থাৱৰ সম্পত্তি জব্দ কৰিছে। আয়ৰ জ্ঞাত উৎসতকৈ অধিক সম্পত্তি আহৰণৰ গোচৰত মুখ্যমন্ত্ৰীৰ তদাৰকী কোষে অতিৰিক্ত আয়ুক্ত সুকন্যা বৰাক গ্ৰেপ্তাৰ কৰাৰ লগতে বিধি বলবৎকাৰী সঞ্চালকালয়ে নিজাববীয়াকৈ তদন্ত আৰম্ভ কৰিছিল। বিধি বলবৎকাৰী সঞ্চালকালয়ৰ তদন্তত অভিযুক্ত সুকন্যা বৰাৰ লগতে তেওঁৰ পৰিয়ালৰ বেংক একাউণ্টত আয়ৰ উৎসৰ সৈতে সামঞ্জস্য নথকাকৈ ৯৮ লাখ ৬৬ হাজাৰ টকা জমা ৰখাৰ তথ্য লাভ কৰিছিল। অভিযুক্ত সুকন্যা বৰাই ৩ কোটি ২৫ লাখ টকাৰ তিনিটাকৈ স্থানত ভূমি ক্ৰয় কৰাৰ লগতে বেংক একাউণ্টত ৬৫ লাখ ৫৪ হাজাৰ টকা জমা ৰখাৰ তথ্য তদন্তত পোহৰলৈ আহে। ইয়াৰ পাছতে তদন্তকাৰী সংস্থাটোৱে বিত্তীয় অনিয়মৰ অভিযোগত অতিৰিক্ত জিলা আয়ুক্ত সুকন্যা বৰাৰ ৭ কোটি ৩৩ লাখ টকাৰ সম্পত্তি জব্দ কৰে। উল্লেখ্য যে পূৰ্বে মুখ্যমন্ত্রী কোষে অভিযুক্ত সুকন্যা বৰাই ৮ কোটি ১৪ লাখ টকাৰ আয়ৰ জ্ঞাত উৎসতকৈ অধিক সম্পত্তি আহৰণৰ তথ্য বিশেষ ন্যায়াধীশৰ আদালতত অভিযোগনামা দাখিল কৰিছিল।