ভিয়েটনামত সংঘটিত প্রচণ্ড সাগৰীয় ধুমুহা য়াগি আৰু ইয়াৰ ফলস্বৰূপে হোৱা বানপানী আৰু ভূমিস্খলনৰ ফলত কমেও ১৪১ জন লোকে প্ৰাণ হেৰুওৱাৰ লগতে আন ৫৯ জন লোক সন্ধানহীন হৈ আছে। দেশখনৰ ৰাষ্ট্ৰীয় বতৰ বিজ্ঞান কেন্দ্ৰৰ আগজাননী অনুসৰি ৰাজধানী মহানগৰী হানয়ৰ মাজেৰে বৈ যোৱা ৰেড ৰিভাৰৰ জলপৃষ্ঠই তিনিটা পৰ্যায়ৰ বিপদসীমাৰ দ্বিতীয়টো পর্যায় ইতিমধ্যে অতিক্রম কৰাৰ লগতে আজি আবেলিৰ ভিতৰত বিপদসীমাৰ তৃতীয় পৰ্যায়টোও অতিক্ৰম কৰাৰ আশংকা আছে। একেদৰে থাও নৈকে ধৰি আনকেইবাখনো নৈৰ পানী অত্যধিক পৰিমাণে বৃদ্ধি পোৱাৰ উপৰি ভালেমান অঞ্চলত বান পৰিস্থিতিৰ উদ্ভৱ হোৱাৰো আগজাননী প্ৰকাশ কৰা হৈছে। উল্লেখযোগ্য ভিয়েটনামৰ উত্তৰ-পূব উপকূলীয় অঞ্চলক সামৰি যোৱা শনিবাৰে আৰম্ভ হোৱা এই সাগৰীয় ধুমুহাৰ ফলত ইতিমধ্যে অঞ্চলটোৰ ঔদ্যোগিক আৰু আৱাসিক এলেকাসমূহ ব্যাপক হাৰত ক্ষতিগ্ৰস্ত হোৱাৰ লগতে ভালেমান অঞ্চল বান আৰু ভূমিস্খলনৰ কবলত পৰে।