◊ গ্ৰীষ্মকালত গৰমৰ প্ৰকোপৰ পৰা হ’ব পৰা ৰোগৰ ব্যৱস্থাপনাৰ প্ৰস্তুতিৰ পৰ্যালোচনা চলোৱাৰ উদ্দেশ্যে কেন্দ্রীয় স্বাস্থ্য মন্ত্রী ড° মনসুখ মন্দাভিয়াৰ অধ্যক্ষতাত আজি এখন বৈঠক অনুষ্ঠিত হয়। বৈঠকত কেন্দ্ৰীয় স্বাস্থ্য সচিব অপূৰ্ব চন্দ্ৰা, নীতি আয়োগৰ সদস্য ডাঃ ভি কে পাল, ভাৰতীয় বতৰ বিজ্ঞান বিভাগৰ সঞ্চালক প্রধান এম মহাপাত্র, ৰাষ্ট্ৰীয় দুৰ্যোগ ব্যৱস্থাপনা প্ৰাধিকৰণৰ সদস্য কমল কিশোৰ, ভাৰতীয় আয়ুর্বিজ্ঞান প্ৰতিষ্ঠানৰ সঞ্চালক আৰু অন্য জ্যেষ্ঠ বিষয়াসকলে বৈঠকত অংশগ্ৰহণ কৰে। পাছত নতুন দিল্লীত সংবাদ মাধ্যমৰ সৈতে হোৱা কথা বতৰাত ড° মনসুখ মন্দাভিয়াই কয় যে, গ্রীষ্ম প্ৰৱাহ আৰু ষ্ট্ৰোকৰ পৰা ৰক্ষা পৰাৰ বাবে কৃষক, নির্মাণকাৰ্যত নিয়োজিত শ্রমিক আৰু নিৰ্বাচনী কাম-কাজত নিয়োজিত তথা প্ৰচাৰ অভিযানত জড়িত ব্যক্তিসকলক পর্যাপ্ত পৰিমাণে পানী গ্রহণ কৰিবলৈ পৰামৰ্শ আগবঢ়োৱা হৈছে। মন্ত্ৰীগৰাকীয়ে কয় যে তেওঁলোকে দেহত পানীৰ মাত্ৰা বৰ্তাই ৰখাৰ বাবে ফলৰ ৰস, নেমুৰ ৰস আৰু বতৰৰ ফলো গ্ৰহণ কৰিব পাৰে। তেওঁ লগতে কয় যে, ৰাজ্যসমূহক এলানি পৰামৰ্শযোগে আয়ুষ্মান আৰোগ্য মন্দিৰসমূহত গৰমৰ পৰা হ’ব পৰা ৰোগৰ চিকিৎসাৰ বাবে সঠিক ব্যৱস্থা কৰিবলৈ কোৱা হৈছে।