♦ লোকসভা নিৰ্বাচনৰ দ্বিতীয় পৰ্যায়ৰ বাবে আজি মনোনয়ন পত্ৰ দাখিলৰ অন্তিম দিন। এই পৰ্যায়ত আউটাৰ মণিপুৰৰ কিছু অংশৰ লগতে ১২ খন ৰাজ্য আৰু কেন্দ্ৰীয় শাসিত অঞ্চলৰ ৮৮টা সংসদীয় সমষ্টিৰ বাবে ভোটগ্রহণ কৰা হ’ব। আউটাৰ মণিপুৰ সমষ্টিৰ কিছু অংশৰ বাবে প্রথম পর্যায়ত ভোটগ্রহণ অনুষ্ঠিত হ’ব। দ্বিতীয় পৰ্যায়ত সামৰিব ল’বলগীয়া সমষ্টি কেইটাৰ ভিতৰত কেৰালাৰ ২০টা, কৰ্ণাটকৰ ১৪টা, ৰাজস্থানৰ ১৩টা, উত্তৰ প্ৰদেশ আৰু মহাৰাষ্ট্ৰৰ ৮টাকৈ, মধ্যপ্ৰদেশৰ ৭টা, অসম আৰু বিহাৰৰ ৫টাকৈ, পশ্চিমবংগ আৰু ছত্তিশগড়ৰ ৩টাকৈ আৰু মণিপুৰ, ত্ৰিপুৰা তথা জম্মু-কাশ্মীৰৰ এটাকৈ সমষ্টি আছে। এই পৰ্যায়ৰ বাবে ২৬ এপ্ৰিলত ভোটগ্রহণ অনুষ্ঠিত হ’ব। এই পৰ্যায়ত সাঙুৰি লোৱা জম্মু-কাশ্মীৰৰ সমষ্টিটোৰ বাহিৰে বাকী সমষ্টি কেইটাৰ বাবে ৫ এপ্ৰিলত মনোনয়ন পত্ৰ পৰীক্ষা কৰা হ’ব। জম্মু-কাশ্মীৰত ৬ এপ্ৰিলত মনোনয়ন পৰীক্ষা কৰা হ’ব।