♦ কেন্দ্রীয় স্বাস্থ্য সচিব অপূৰ্ব চন্দ্ৰাই ধঁপাতে জনস্বাস্থ্যৰ প্ৰতি ভাবুকি কঢ়িয়াই আনে বুলি প্ৰকাশ কৰিছে। নতুন দিল্লীত আজি বিশ্ব ধঁপাত বিৰোধী দিৱস উপলক্ষে আয়োজিত এটা অনুষ্ঠানত শ্ৰী চন্দ্ৰাই ভাৰতত ধঁপাত সেৱনৰ ফলত হোৱা বিভিন্ন ৰোগৰ ফলত বছৰি ১৩ লাখ লোক মৃত্যু মুখত পৰে বুলি প্ৰকাশ কৰে । ধঁপাত সেৱনৰ ফলত দেশৰ স্বাস্থ্য সেৱা ব্যৱস্থাত আর্থিক উন্নয়নত বাধাৰ সৃষ্টি কৰে বুলি প্ৰকাশ কৰে। তেওঁ লগতে কয় যে, চৰকাৰে দেশত ধঁপাতজাতীয় সামগ্ৰীৰ ব্যৱহাৰৰ বিৰুদ্ধে ধাৰাবাহিকভাৱে বিভিন্ন পদক্ষেপ গ্ৰহণ কৰি আহিছে আৰু স্থানীয়, আঞ্চলিক, ৰাষ্ট্ৰীয় আৰু গোলকীয় পৰ্য্যায়ত এই জটিল বিষয়ৰ সমস্যাৰ সন্মুখীন হোৱাৰ বাবে বিভিন্ন প্ৰয়াস অব্যাহত ৰাখিছে।
তেওঁ লগতে কয় যে, ২০২৪ বৰ্ষত চৰকাৰে ধঁপাত নিয়ন্ত্ৰণৰ বাবে বিশেষ পদক্ষেপ গ্ৰহণ কৰিছে। ইয়াৰ বাবে ৰাষ্ট্ৰীয় ধঁপাত নিয়ন্ত্রণ আইন COTPA- ২০০৩ কঠোৰভাৱে বলবৎ কৰাৰ লগতে ইয়াৰ বিৰুদ্ধে সজাগতা অভিযান চলোৱাৰ উপৰি ধঁপাতমুক্ত পৰিৱেশ সৃষ্টিৰ বাবে পদক্ষেপ গ্ৰহণ কৰা হৈছে।