তিনিচুকীয়া জিলা গঠনৰ আজি ৩৫ বছৰ সম্পূৰ্ণ হৈছে। ১৯৮৯ চনৰ ১ অক্টোবৰত পূৰ্ণ পৰ্যায়ৰ জিলা হিচাপে তিনিচুকীয়াই স্বীকৃতি লাভ কৰিছিল। ১৯৭১ চনলৈকে অবিভক্ত লখিমপুৰ জিলাৰ অন্তৰ্গত হৈ থকা তিনিচুকীয়া পৰৱৰ্তী সময়ত অবিভক্ত ডিব্ৰুগড় জিলাৰ অন্তৰ্ভুক্ত হৈছিল। প্ৰশাসনে এইবাৰ জিলাখনৰ বৰগুড়িত থকা আই টি আই খেলপথাৰত জিলা দিৱসৰ আয়োজন কৰিছে। আজি জিলা দিৱসৰ কাৰ্যসূচীৰ অংশ হিচাপে শদিয়া মহকুমা প্রশাসন, আৰক্ষী প্ৰশাসন, স্বাস্থ্য, ক্রীড়া আদি বিভাগৰ উদ্যোগত চাইকেল সমদল উলিওৱা হয়। এই সমদলত বিভিন্ন বিদ্যালয়ৰ ছাত্ৰ-ছাত্ৰী, যুৱক-যুৱতী আৰু জ্যেষ্ঠ নাগৰিক অংশগ্ৰহণ কৰে।