চলিত বছৰৰ মাৰ্চত মুঠ সামগ্ৰী আৰু সেৱাকৰৰ ৰাজহ সংগ্ৰহ এতিয়ালৈ দ্বিতীয় সর্বাধিক হিচাপে পৰিগণিত হৈছে। বছৰি ১১ শতাংশতকৈও অধিক বৃদ্ধি হৈ এইবেলি এই পৰিমাণ হৈছে, ১ লাখ ৭৮ হাজাৰ কোটি টকা। কেন্দ্রীয় বিত্ত মন্ত্ৰ্যালয়ে প্ৰকাশ কৰা অনুসৰি, ১৭.৬ শতাংশ ঘৰুৱা লেন-দেনৰ জৰিয়তে জি এছ টি সংগ্রহত উল্লেখনীয় বৃদ্ধি হোৱাৰ ফলত এই অভিলেখ সৃষ্টি হৈছে। যোৱাটো বিত্তীয় বৰ্ষত মাহিলী সংগ্ৰহৰ পৰিমাণ আছিল গড়ে ১ লাখ ৬৮ হাজাৰ কোটি টকা। তাৰ পূৰ্বৰ বছৰৰ গড়ে ১ লাখ ৫০ হাজাৰ কোটি টকাতকৈ এই পৰিমাণ অধিক আছিল। মন্ত্ৰ্যালয়ে প্ৰকাশ কৰা অনুসৰি, চলিত বৰ্ষৰ মাৰ্চত ধনৰ প্রত্যর্পণৰ মুঠ জি এছ টি ৰাজহ সংগ্ৰহ ১ লাখ ৬৫ হাজাৰ কোটি টকা। এই পৰিমাণ বিগত বৰ্ষৰ একেটা সময়ৰ তুলনাত ১৮.৪ শতাংশৰো অধিক৷