ভাৰতে যোৱা নিশা নিউয়ৰ্কৰ নাছাউকাণ্টিত অনুষ্ঠিত আই চি চি টি-২০ বিশ্বকাপ ক্রিকেট প্রতিযোগিতাৰ এখন খেলত আমেৰিকা যুক্তৰাষ্ট্ৰক ৭ উইকেটত পৰাস্ত কৰে। ভাৰতে এই জয়ৰ সুবাদত প্ৰতিযোগিতাৰ ছুপাৰ-এইট পর্যায়ত স্থান নিশ্চিত কৰিছে। খেলখনত আমেৰিকা যুক্তৰাষ্ট্ৰই প্ৰথমে বেট ধৰাৰ আমন্ত্ৰণ লাভ কৰি নিৰ্ধাৰিত ২০ অভাৰত আঠটা উইকেট হেৰুৱাই ১১০ ৰান কৰে। আমেৰিকাৰ হৈ নীতিশ কুমাৰে ২৩টা বলত ২৭ ৰান সংগ্ৰহ কৰে। ভাৰতৰ অৰ্শদীপ সিঙে চাৰিটা উইকেট লাভ কৰে। ভাৰতে ১১১ ৰানৰ বিজয় লক্ষ্যৰে খেল আৰম্ভ কৰি আৰম্ভণিতে দুটাকৈ উইকেট হেৰুৱায়। বিৰাট কোহলিয়ে এটাও ৰান নকৰাকৈ আৰু ৰোহিত শর্মাই ৩ ৰান কৰি আউট হয়। আমেৰিকাৰ বাঁওহতীয়া বেগী বলাৰ সৌৰভ নেত্ৰাৱলকৰে দুয়োটা উইকেট দখল কৰে। ভাৰতে সূর্যকুমাৰ যাদৱৰ আকৰ্ষণীয় অর্ধশতক আৰু শিৱম ডুবেৰ ৩১ ৰানৰ সহায়ত খেলখনত জয়লাভ কৰে।
ইপিনে, ৱেষ্ট ইণ্ডিজৰ কিংষ্টনত হ’বলগীয়া এখন খেলত বাংলাদেশ নেডাৰলেণ্ডছৰ সন্মুখীন হ’ব। খেলখন ভাৰতীয় সময় অনুসৰি নিশা ৮ বজাত আৰম্ভ হ’ব।