ৰাষ্ট্ৰপতি শ্ৰীমতী দ্রৌপদী মুৰ্মু আৰু প্ৰধানমন্ত্ৰী নৰেন্দ্ৰ মোদীয়ে চলিত পেৰিছ পেৰালিম্পিকছৰ পুৰুষৰ জেভলিন থ্ৰ’ত সোণৰ পদক অৰ্জন কৰা সুমিত আন্তিলক অভিনন্দন জনাইছে। সামাজিক মাধ্যমৰ এটা পষ্টত ৰাষ্ট্ৰপতিগৰাকীয়ে কয় যে, পেৰালিম্পিকছত একেৰাহে অৰ্জন কৰা দুটা সোণৰ পদক আৰু অভিলেখ সৃষ্টিকাৰী প্ৰদৰ্শনেৰে খেলুৱৈগৰাকী চেম্পিয়নসকলৰ মাজতো বিশেষ হিচাপে পৰিগণিত হৈছে। এই সাফল্যই অগণন লোক, বিশেষকৈ যুৱ চামক অনুপ্রাণিত কৰিব বুলি তেওঁ উল্লেখ কৰে। ইপিনে প্রধানমন্ত্ৰী নৰেন্দ্ৰ মোদীয়ে আন্তিলৰ এই প্ৰদৰ্শনক ব্যতিক্রমী হিচাপে অভিহিত কৰিছে। প্রধানমন্ত্ৰীয়ে কয় যে, খেলুৱৈগৰাকীয়ে অসাধাৰণ ধাৰাবাহিকতা আৰু উৎকৃষ্টতা প্ৰদৰ্শন কৰিছে। প্রধানমন্ত্ৰীয়ে খেলুৱৈগৰাকীক ভৱিষ্যতৰ বাবে শুভেচ্ছা জ্ঞাপন কৰে।