অসমক প্রতিনিধিত্ব কৰা গুৱাহাটীৰ বেটকুছি হাইস্কুলে চলিত ৬৩ সংখ্যক সুব্রত কাপ ফুটবল প্রতিযোগিতাৰ জুনিয়ৰ ছোৱালী শাখাৰ কোৱাৰ্টাৰ ফাইনেলত প্ৰৱেশ কৰিছে। ভাৰতীয় বায়ুসেনাই আয়োজন কৰা প্রতিযোগিতাখনৰ নতুন দিল্লীৰ জি ডি গোৱেংকা এডুকেশ্বন চিটী গ্রাউণ্ডত অনুষ্ঠিত গ্রুপ-এৰ অন্তিমখন খেলত কালি বেটকুছি হাইস্কুলে মেঘালয়ৰ জৱাহৰ নবোদয় বিদ্যালয়ক ৪-০ গ’লৰ ব্যৱধানত পৰাস্ত কৰে। গুৱাহাটীৰ এই দলটোৱে গ্ৰুপৰ চাৰিখন খেলৰ তিনিখনত জয় আৰু এখন ড্র’ খেলী অপৰাজেয় হৈ শীর্ষ দল হিচাপে কোৱাৰ্টাৰ ফাইনেলত স্থান নিশ্চিত কৰিছে। দলটোৱে কোৱাৰ্টাৰ ফাইনেলত বাংলাদেশৰ বিৰুদ্ধে অৱতীৰ্ণ হ’ব। উল্লেখযোগ্য যে নতুন দিল্লীত চলি থকা প্ৰতিযোগিতাখনত এইবাৰ অভিলেখ সংখ্যক দেশ তথা বিদেশৰ ১১১টা দলে অংশগ্রহণ কৰিছে।