ছিংগাপুৰ চৰকাৰৰ আমন্ত্রণমর্মে দেশখন ভ্ৰমণলৈ যোৱা কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে আজি দেশখনৰ জ্যেষ্ঠ মন্ত্ৰী ড° এমি খোড়ৰ সৈতে ছিংগাপুৰ সামুদ্রিক সপ্তাহৰ অংশ হিচাপে ভাৰত মণ্ডপ উদ্বোধন কৰে। এই মণ্ডপত ভাৰতৰ সামুদ্রিক উদ্ভাৱন আৰু শক্তি সম্ভাৱনা এই মণ্ডপ ভাৰত আৰু ছিংগাপুৰৰ ৬০ বছৰীয়া কূটনৈতিক সম্পৰ্কৰ উদযাপনৰ মঞ্চ হিচাপে পৰিগণিত হৈছে বুলি শ্ৰী সোণোৱালে প্ৰকাশ কৰিছে। মন্ত্ৰীগৰাকীয়ে আজি এই অনুষ্ঠানত অংশ লোৱাৰ আগেয়ে ভাৰতীয় জাহাজ পৰিবহণ পঞ্জীয়কৰ মণ্ডপো মুকলি কৰে। দেশখনত সামুদ্রিক সুৰক্ষা পৰিৱেশ সংৰক্ষণ আৰু প্ৰযুক্তিগত উদ্ভাৱনৰ অগ্ৰগতি এই মণ্ডপত সুন্দৰকৈ প্ৰতিফলিত হৈছে। শ্ৰী সোণোৱালে আজি সামুদ্রিক সপ্তাহত অংশ লোৱাৰ লগতে নেডাৰলেণ্ডৰ উপ মন্ত্ৰী ব্ৰিডজিৎ গিছৱাৰ্ছৰ সৈতে সৌহার্দ্যপূর্ণ দ্বিপাক্ষিক বৈঠকত মিলিত হয়। এই বৈঠকত দুয়োগৰাকী নেতাই দুয়োদেশৰ জলপথ আৰু স্মাৰ্ট বন্দৰ উন্নয়ন, সেউজ জাহাজ পৰিবহণ আৰু জাহাজ চলাচলৰ গুৰুত্বপূৰ্ণ বিষয়সমূহ আলোচনা কৰে। মন্ত্ৰীগৰাকীয়ে আজি ছিংগাপুৰৰ প্ৰমোদ তৰী কেন্দ্ৰটো পৰিদৰ্শন কৰে। ভাৰতত এনেধৰণৰ প্ৰমোদ তৰী পৰ্যটনৰ বিকাশৰ বাবে পদক্ষেপ গ্ৰহণ কৰা হৈছে বুলিও মন্ত্ৰীগৰাকীয়ে প্ৰকাশ কৰে ।