হাইব্রিড যুদ্ধ, চাইবাৰ আৰু মহাকাশ ভিত্তিক বাধাৰ দৰে অগতানুগতিক বিপদসমূহে নিৰাপত্তা ব্যৱস্থাত প্ৰত্যাহ্বানৰ সৃষ্টি কৰিছে। নতুন দিল্লীত আজি আভ্যন্তৰীণ সুৰক্ষাৰ বাবে উন্নত প্রযুক্তি শীর্ষক এখন আলোচনা চক্ৰত অংশ লৈ দিয়া ভাষণত প্ৰতিৰক্ষা মন্ত্ৰী ৰাজনাথ সিঙে এই কথা প্ৰকাশ কৰে। তেওঁ কয়, যে আভ্যন্তৰীণ আৰু বাহ্যিক সুৰক্ষাৰ মাজত সামঞ্জস্য নোহোৱাৰ বাবে বৰ্তমান সমগ্ৰ বিশ্বতে নিৰাপত্তা পৰিস্থিতি যথেষ্ট কঠিন হৈ পৰিছে। বিদ্ৰোহী সংগঠন, বাওঁপন্থী উগ্ৰবাদ আৰু সন্ত্ৰাসবাদী সমস্যাৰে জৰ্জৰিত অঞ্চলসমূহৰ নিজৰ বহু সমস্যা আছে বুলি উল্লেখ কৰি শ্ৰী সিঙে এনে প্ৰত্যাহ্বানৰ মুখামুখি হ‘বলৈ কেতবোৰ বিশেষ ক্ষেত্ৰত গুৰুত্ব আৰোপ কৰে। তেওঁ উল্লেখ কৰে যে, নিৰাপত্তা প্ৰতিষ্ঠানসমূহে সহযোগিতামূলকভাৱে কাম কৰাটো নিশ্চিত কৰিব বাবে চৰকাৰে প্ৰচেষ্টা চলাইছে। এই ক্ষেত্ৰত প্ৰতিৰক্ষা গৱেষণা আৰু উন্নয়ন সংস্থা, ডি আৰ ডি অ‘ৰ অৱদানৰ শলাগ লৈ কেন্দ্ৰীয় মন্ত্ৰীগৰাকীয়ে কয়, যে এই সংস্থাটোৱে ভালেসংখ্যক নতুন প্ৰযুক্তিৰ বিকাশ ঘটাইছে। ডি আৰ ডি অ‘ই কেন্দ্ৰীয় সশস্ত্ৰ আৰক্ষী বাহিনী আৰু আন আন নিৰাপত্তা সংস্থাসমূহৰ বাবে বহু প্রযুক্তি গঢ়ি তুলিছে বুলিও শ্রী সিঙে মত প্ৰকাশ কৰে।