প্ৰতিৰক্ষা মন্ত্ৰী ৰাজনাথ সিঙে প্ৰতিৰক্ষা গৱেষণা আৰু উন্নয়ন সংস্থাক ইয়াৰ গৱেষণা আৰু উন্নয়নমূলক কামকাজত ষ্টার্টআপক সামৰি লোৱাৰ সম্ভাৱনাক অন্বেষণ কৰাৰ বাবে আহ্বান জনাইছে। নতুন দিল্লীত আজি ডি আৰ ডি অ’ৰ ৬৭ সংখ্যক প্ৰতিষ্ঠা দিৱসৰ কাৰ্যসূচীক সম্বোধন কৰি তেওঁ এই কথা প্ৰকাশ কৰে। শ্ৰী সিঙে কয়, যে ভাৰতৰ প্ৰতিৰক্ষা খণ্ডৰ বাবে নতুন উদ্ভাৱনী প্ৰযুক্তিৰ সুবিধা গ্ৰহণ কৰিবলৈ এই সংস্থাই নতুন নতুন মূল্যবান ধাৰণা গ্ৰহণ কৰা উচিত। তেওঁ দেশৰ নিৰাপত্তা বাহিনীসমূহৰ বাবে অস্ত্ৰ-শস্ত্ৰৰ থলুৱাভাৱে বিকশাই তোলাৰ বাবে প্ৰতিৰক্ষা গৱেষণা আৰু উন্নয়ন সংস্থাক প্ৰশংসা কৰিছে। তেওঁ ব্যক্তিগত খণ্ডৰ সৈতে প্ৰযুক্তি আৰু পেটেণ্ট আদান-প্ৰদান কৰি যুটীয়াভাৱে বিভিন্ন কাম কৰাৰ প্ৰয়াসক প্ৰশংসা কৰিছে। ২০২৫ বৰ্ষক সংস্কাৰৰ বৰ্ষ হিচাপে অভিহিত কৰি শ্ৰী সিঙে এই প্ৰতিৰক্ষা সংস্থাই ইয়াৰ বিভিন্ন কাৰ্যসূচীসমূহ ৰূপায়ণৰ ক্ষেত্ৰত সফলতা অৰ্জন কৰাত এটা বিশেষ ভূমিকা গ্ৰহণ কৰিব বুলি আশা প্ৰকাশ কৰে। তেওঁ সঘনে সলনি হৈ থকা প্ৰযুক্তিৰ সৈতে তাল মিলাই কাম কৰি যাবলৈও সংস্থাটোৰ প্ৰতি আহ্বান জনায়। তেওঁ প্ৰযুক্তিৰ ক্ষেত্ৰত উন্নত দেশসমূহৰ প্ৰতি লক্ষ্য ৰাখি নতুন উদ্ভাৱন কৰিবলৈ বিজ্ঞানীসকলৰ প্ৰতি আহ্বান জনায়।