ৰাভা হাছং স্বায়ত্তশাসিত পৰিষদৰ নিৰ্বাচনৰ বাবে বিভিন্ন ৰাজনৈতিক দলে আজিও দলীয় প্রার্থীৰ সমৰ্থনত ব্যাপক প্ৰচাৰ চলায়। বিজেপি, ৰাভা হাছং যৌথ সংগ্ৰাম সমিতি আৰু অসম গণ পৰিষদ দলে ঐক্যবদ্ধভাৱে প্ৰচাৰ অভিযান চলাই আছে। কংগ্ৰেছ দলৰ লগতে অন্যান্য ৰাজনৈতিক দল আৰু নিৰ্দলীয় প্ৰাৰ্থীয়ে পৰিষদৰ অন্তৰ্গত দুখন জিলাৰ নিৰ্বাচন হ’বলগীয়া ৩৩টা সমষ্টিত প্ৰচাৰ তীব্ৰ কৰি তুলিছে। পৰিষদৰ অন্তৰ্গত কামৰূপ জিলাৰ ১৪টা সমষ্টিৰ বাবে প্ৰচাৰ অভিযান তীব্ৰতৰ হৈছে। ৰাভা-হাছং যৌথ সংগ্ৰাম সমিতিৰ মুখ্য আহ্বায়ক তথা ৰাভা-হাছং স্বায়ত্তশাসিত পৰিষদৰ মুখ্য কাৰ্যবাহী সদস্য টংকেশ্বৰ ৰাভাই আজি পৰিষদৰ অন্তৰ্গত অসম-মেঘালয় সীমান্তৱৰ্তী এলেকাসমূহত প্ৰচাৰ চলায়। তেওঁ অঞ্চলটোৰ ভোটদাতাসকলৰ সৈতে মত বিনিময় কৰে।
অসম প্ৰদেশ তৃণমূল কংগ্ৰেছৰ উপসভাপতি দুলু আহমেদে আজি ছয়গাঁৱৰ বীৰপাৰাত নিৰ্বাচনী প্ৰচাৰ চলায়। বিজেপি আৰু কংগ্ৰেছ দলেও আজি সমষ্টি কেইটাত প্ৰচাৰ অভিযানত অংশ লয়। গোৱালপাৰা জিলাৰ নিৰ্বাচন হ’বলগীয়া ১৯টা পৰিষদীয় সমষ্টিৰ বাবে আজি শাসক-বিৰোধী দলে প্ৰচাৰ অভিযানত অংশ লয়। ৰাভা হাছং স্বায়ত্তশাসিত পৰিষদত গোৱালপাৰা জিলাত ২০টা আৰু কামৰূপ গ্ৰাম্য জিলাত ১৬টা পৰিষদীয় সমষ্টি আছে। ইয়াৰে গোৱালপাৰা জিলাত এটা আৰু কামৰূপ জিলাৰ দুটা সমষ্টিত এন ডি এৰ প্ৰাৰ্থী বিনাপ্রতিদ্বন্দ্বিতাৰে জয়ী হোৱাৰ পৰিপ্ৰেক্ষিতত মুঠ ৩৩টা সমষ্টিৰ বাবে ৯৬গৰাকী প্ৰাৰ্থী প্রতিদ্বন্দ্বিতাত অৱতীৰ্ণ হ’ব। অহা ২ এপ্ৰিলৰ পুৱা ৭ বজাৰ পৰা বিয়লি ৩ বজালৈ ভোটগ্রহণ অনুষ্ঠিত হ’ব। ৪ এপ্ৰিলত নিৰ্বাচনৰ ফলাফল ঘোষণা কৰা হ’ব।