ৰাষ্ট্ৰপতি শ্ৰীমতী দ্রৌপদী মুৰ্মুৱে দুদিনীয়া ভ্ৰমণসূচীৰে গৃহৰাজ্য ওড়িশাত উপস্থিত হৈছে। ৰাষ্ট্ৰপতিগৰাকীক ৰাজ্যখনৰ বিজু পাটনায়ক আন্তঃৰাষ্ট্ৰীয় বিমান বন্দৰত ৰাজ্যপাল হৰিবাবু কান্তামপটি আৰু মুখ্যমন্ত্রী মোহন চৰণ মাঝি আৰু অন্যান্য জ্যেষ্ঠ বিষয়াসকলে আদৰণি জনায়। ৰাষ্ট্ৰপতিগৰাকীয়ে কাইলৈ ১৮ সংখ্যক প্রবাসী ভাৰতীয় সন্মিলনত অংশগ্রহণ কৰিব। ভুৱনেশ্বৰৰ জনতা ময়দানত ভাৰত আৰু ওড়িশা চৰকাৰৰ যুটীয়া উদ্যোগত অনুষ্ঠিত প্রবাসী ভাৰতীয় সন্মিলনত ৭৫খন দেশত থকা প্ৰায় ৬ হাজাৰ প্ৰবাসী ভাৰতীয়ই অংশগ্ৰহণ কৰে। এই সন্মিলনতে ৰাষ্ট্ৰপতিগৰাকীয়ে বিভিন্ন ক্ষেত্ৰত উৎকৃষ্টতা প্ৰদৰ্শন কৰা ১৭গৰাকী প্রবাসী ভাৰতীয়ক, প্রবাসী ভাৰতীয় সন্মান আগবঢ়াব ।