প্রধানমন্ত্ৰী নৰেন্দ্ৰ মোদীয়ে আজি পুৱা নতুন দিল্লীৰ ভাৰত মণ্ডপমত আন্তঃৰাষ্ট্ৰীয় দূৰসংযোগ সংঘ, আই টি ইউৰ বিশ্ব দূৰসংযোগ মানক সন্মিলন ২০২৪ মুকলি কৰে। বিশ্ব দূৰসংযোগ মানক সন্মিলন হ’ল ৰাষ্ট্ৰসংঘৰ ডিজিটেল প্রযুক্তি সংস্থা আন্তঃৰাষ্ট্ৰীয় দূৰসংযোগ সংঘৰ কামৰ মান অধিক উন্নত কৰাৰ বাবে প্ৰতি ৪ বছৰৰ মূৰত আয়োজিত প্ৰশাসনীয় সন্মিলন। এইবেলি প্ৰথমবাৰৰ বাবে এই সন্মিলন ভাৰত তথা এছিয়া প্রশান্ত মহাসাগৰীয় অঞ্চলত আয়োজন কৰা হৈছে। সন্মিলনত ১৯০ খনতকৈও অধিক দেশৰ প্ৰতিনিধিৰ অংশগ্রহণ। ইপিনে, চলিত বৰ্ষৰ ভাৰত মোবাইল কংগ্ৰেছত ১২০ খনতকৈও অধিক দেশে অংশগ্ৰহণ কৰিব। ইয়াত ৪০০ গৰাকীতকৈও অধিক প্ৰদৰ্শনকাৰী আৰু প্ৰায় ৯০০টা ষ্টাৰ্ট আপে ভাগ ল’ব। অনুষ্ঠানত ৬০০ গৰাকীতকৈও অধিক আন্তঃৰাষ্ট্ৰীয় আৰু ভাৰতীয় বক্তাই বিভিন্ন বিষয় লৈ আলোচনা কৰিব।