অসমৰ নেতৃত্বত সমগ্ৰ উত্তৰ পূৰ্বাঞ্চলে নতুন ভৱিষ্যত সূচনা কৰাৰ দিশে অগ্ৰসৰ হৈছে। একেদৰে গোলকীয় অনিশ্চয়তাৰ মাজতো বিশ্বৰ বহু বিশেষজ্ঞই সম্প্ৰতি ভাৰতৰ খৰতকীয়া বিকাশৰ কথা আলোচনা কৰিবলৈ লৈছে। প্রধানমন্ত্ৰী নৰেন্দ্ৰ মোদীয়ে আজি গুৱাহাটীত অনুষ্ঠিত দ্বিতীয় এডভান্টেজ আছাম বিনিয়োগ আৰু আন্তঃগাঁথনি সন্মিলন উদ্বোধন কৰি এইদৰে কয়। প্রধানমন্ত্ৰীয়ে কয়, যে বৰ্তমানৰ ভাৰতে এখোজ এখোজকৈ আগবাঢ়ি যোৱাৰ সমান্তৰালকৈ একবিংশ শতিকাৰ অনাগত ২৫ বছৰৰ দীৰ্ঘম্যাদী লক্ষ্য মনত ৰাখি বৃহৎ পৰিসৰত কামত অগ্ৰসৰ হৈছে। বিশ্বই বৰ্তমান ভাৰতৰ প্ৰশাসনত আস্থা ৰাখিছে বুলি উল্লেখ কৰি শ্ৰী মোদীয়ে দক্ষতাৰ দিশত খৰতকীয়াকৈ আগবাঢ়ি যোৱা দেশৰ যুৱ সমাজ আৰু মধ্যবিত্ত শ্ৰেণীৰ কথা উল্লেখ কৰে।
দ্বিতীয় এডভান্টেজ আছামৰ উদ্বোধনী ভাষণত প্রধানমন্ত্ৰীয়ে বিভিন্ন দেশৰ প্ৰতিনিধি আৰু দেশ- বিদেশৰ বিনিয়োগকাৰীৰ সন্মুখত অসমৰ নিজস্ব পৰিচয় স্বৰূপ চাহ উদ্যোগৰ ২০০ বছৰ সম্পূৰ্ণ হোৱাৰ কথা উল্লেখ কৰে। তেওঁ কয়, যে এই চাহ উদ্যোগে এতিয়া আন আন উদ্যোগকো আগবাঢ়ি যাবলৈ প্ৰেৰণা যোগাইছে। ৰাজ্যখনত স্থাপন হ‘বলগীয়া ইউৰিয়া প্ৰকল্পই সমগ্ৰ দেশৰে চাহিদা পূৰণ কৰিবলৈ সমৰ্থ হ‘ব বুলি উল্লেখ কৰি প্ৰধানমন্ত্ৰীয়ে অচিৰেই অসম উত্তৰ-পূবৰ নিৰ্মাণ খণ্ডৰ কেন্দ্ৰ হৈ উঠিব বুলি আশা প্ৰকাশ কৰে। তেওঁ কয়, যে নির্মাণ খণ্ডত অসম বহুখিনি আগবাঢ়ি গৈছে আৰু উচ্চমানৰ প্ৰযুক্তিৰ লগতে ৰাজ্যখন ষ্টার্টআপৰ কেন্দ্ৰত পৰিণত হৈছে। ৰাজ্যখনৰ জাগীৰোডত স্থাপন হ‘বলগীয়া ছেমি কণ্ডাক্টৰ প্ৰকল্প অনাগত সময়ত উত্তৰ- পূৰ্বাঞ্চলৰ পৰিচয় হৈ উঠিব বুলি উল্লেখ কৰি শ্ৰীমোদীয়ে কয়, যে অনাগত সময়ত ভাৰত ছেমি কণ্ডাক্টৰ খণ্ডত বিশ্বৰ আগশাৰীৰ দেশ হৈ উঠাৰ লগতে ছেমি কণ্ডাক্টৰ প্ৰকল্পৰ জৰিয়তে অসমৰ অৰ্থনীতিও সুদৃঢ় হ‘ব। প্রধানমন্ত্ৰীয়ে বিনিয়োগকাৰীসকলক অসমত বিনিয়োগৰ বাবে আগবাঢ়ি আহিবলৈ আহ্বান জনায়।