ভাৰত আৰু নিউজিলেণ্ডৰ মাজত আজি প্ৰতিৰক্ষা, শিক্ষা, ক্রীড়া, উদ্যানশস্য আৰু বনাঞ্চল বিষয়ৰ ৫ খন চুক্তি স্বাক্ষৰিত হয়। দুয়োখন দেশে অর্থনৈতিক ব্যৱস্থাৰ পাৰস্পৰিক গ্রহণযোগ্যতাৰ চুক্তিও স্বাক্ষৰ কৰে। দুয়ো পক্ষই মুক্ত বাণিজ্য চুক্তি আলোচনা আৰু পেচাদাৰী তথা দক্ষ শ্রমিকৰ গতিশীলতাৰ বাবে সহজলভ্য ব্যৱস্থাপনাৰ বিষয়ে আলোচনা কৰাৰ কথাও ঘোষণা কৰে ।
প্রধানমন্ত্ৰী নৰেন্দ্ৰ মোদীয়ে আজি নিউজিলেণ্ডৰ প্ৰধানমন্ত্ৰী ক্রিষ্টফাৰ লাক্সনৰ সৈতে এখন গুৰুত্বপূৰ্ণ বৈঠকত অংশগ্ৰহণ কৰে ।
সংবাদ মাধ্যমযোগে দিয়া এটা বিবৃতিত শ্রীমোদীয়ে কয়, যে তেওঁলোকে দ্বিপাক্ষিক সম্পৰ্কৰ বিভিন্ন দিশৰ বিষয়ে বিশদভাৱে আলোচনা কৰে আৰু দুয়োপক্ষই প্ৰতিৰক্ষা তথা সুৰক্ষা অংশীদাৰিত্ব শক্তিশালী কৰাৰ সিদ্ধান্ত গ্ৰহণ কৰে। তেওঁ কয়, যে যৌথ অনুশীলনৰ লগতে প্ৰশিক্ষণ, বন্দৰ ভ্ৰমণ আৰু প্ৰতিৰক্ষা উদ্যোগতো পাৰস্পৰিক সহযোগিতাৰ বাবে ৰোড মেপ প্ৰস্তুত কৰা হ’ব। প্রধানমন্ত্রীয়ে লগতে কয়, যে দুয়োখন দেশৰ মাজত পাৰস্পৰিকভাৱে লাভজনক মুক্ত বাণিজ্য চুক্তিৰ আলোচনা আৰম্ভ কৰাৰ সিদ্ধান্তও গ্ৰহণ কৰা হয় যিয়ে পাৰস্পৰিক বাণিজ্য আৰু বিনিয়োগৰ সম্ভাৱনা বৃদ্ধি কৰিব। তেওঁ লগতে কয় যে ক্রীড়া বিজ্ঞান, মনোবিজ্ঞান, চিকিৎসা বিজ্ঞানৰ ক্ষেত্ৰত সহযোগিতাৰ সিদ্ধান্ত গ্ৰহণ কৰা হয়। অহা বছৰলৈ দুয়োখন দেশৰ মাজত থকা ক্রীড়া সম্পৰ্কৰ শতবার্ষিকী উদযাপন কৰাৰো সিদ্ধান্ত গ্ৰহণ কৰা হয় বুলি প্ৰধানমন্ত্ৰীগৰাকীয়ে জানিবলৈ দিয়ে। ভাৰত আৰু নিউজিলেণ্ডৰ মাজত সন্ত্রাসবাদ, বিচ্ছিন্নতাবাদী আৰু উগ্ৰবাদৰ বিৰুদ্ধে সহযোগিতা অব্যাহত থাকিব বুলিও তেওঁ কয়।
নিউজিলেণ্ডৰ প্ৰধানমন্ত্ৰী শ্ৰী লাক্সনে তেওঁৰ বিবৃতিত কয় যে দুয়োপক্ষই পাৰস্পৰিকভাৱে লাভজনক মুক্ত বাণিজ্য চুক্তিৰ বাবে আগ্রহী। নিউজিলেণ্ডে ভাৰতত কুটনৈতিক উপস্থিতি বৃদ্ধি কৰিব বুলিও শ্রীলাক্সনে কয়। নিউজিলেণ্ডৰ প্ৰধানমন্ত্ৰীগৰাকীয়ে আজি সন্ধিয়া ৰাষ্ট্ৰপতি ভৱনত ৰাষ্ট্ৰপতি শ্ৰীমতী দ্রৌপদী মুমুর্ক সাক্ষাৎ কৰিব।
উল্লেখযোগ্য যে শ্ৰীলাক্সনৰ এই ভ্ৰমণৰ লক্ষ্য হৈছে ভাৰত নিউজিলেণ্ডৰ দ্বিপাক্ষিক সম্পর্কক অধিক শক্তিশালী কৰা। ৫ দিনীয়া ভাৰত ভ্ৰমণসূচীৰে নেতাগৰাকীয়ে কালি নতুন দিল্লীত উপস্থিত হয়। এই ভ্রমণকালত দেশখনৰ একাধিক মন্ত্ৰী, জ্যেষ্ঠ বিষয়া, ব্যৱসায়ী, সংবাদ কৰ্মী আৰু প্ৰৱাসী ভাৰতীয়ৰ এটা উচ্চ পৰ্যায়ৰ প্ৰতিনিধি দলে তেওঁক সংগ দিছে।